Etorkizuna ez dator berez, eraiki egiten dugu

“Konfiantza”, “gizarte adostasuna”,  “integrazioa”, “irekiera”, “malgusegurtasuna”,  “erakargarria”, “pertsona sortzaileak sare globaletan”, “ametsa”, “kontakizunak”, “ulermena”, “berrikuntza”, “sorkuntza prozesuan dauden identitate berriak”,…  Kristina Sogaard daniarraren  eta Jeffrey Saunders estatu batuarraren diskurtso aberatsa betetzen duten hitzetako batzuk dira. Ah!!! Eta gaztelaniaz erabiltzen dugun  gure @  edo “los vascos y vascas”  horren parean, ingelesezko euren power pointean benetan polita den formula bat erabili zuten lengoaia sexista ekiditeko: “(wo) man”.

Egia esan euren hitz horiek makina bat hausnarketa eragin didate eta aitortu behar dut etorkizuneko mezu hori datorren igandean Alderdi Egunan  emango dudan hitzaldiaren zati handi baten oinarria eta abiaburua izango dela.

Erantzukizun itzela!

Aralarretik egunera arte beti egon naiz urteroko gure zitan, batzuetan muntaketaren atzean lanean, segurtasun lanetan, EGIren kanpaldian, Alonsotegi edo Durangoko uri erakundeekin, agertokian Bizkaiko edo EBBren burukide moduan  eta aurtengoa sekulako konpromisoa da niretzat!: lehenengoz, aurrean milaka pertsona edukita,  EBBren lehendakari moduan.  Uffff!!! Ezin dizuet ukatu kontzentraturik eta tentsioan nagoela. Uste dut erantzukizuna gainditzeko gauza izango naizela; hori bai, jakin dakit handik goitik, agertokitik,  hunkitu egingo naizela niretzat hain maiteak izan diren eta gaur gure artean ez dauden pertsona batzuk gogoratuz.

Barkatu beharko didazue baina oraindik ere asko kostatzen zait blogaren bidez sentimenduak transmititzea. Baina itzul gaitezen gure iparraldeko lagunekin izan dugun esperientziara.

Jardunaldi emankor honi buruzko aurreko postean ere esaten nuen bezala Copenhagen Institute for Futures Studies-eko ordezkariek “Gizarte aldaketa sustatuz 2020ko epemugarako. Euskal Herriaren etorkizuna”txostenaren lehen ondorioak aurkeztu zituzten  Euskalduna Jauregian.

Lan ordu batzuk konpartitu genituen ehun bat euskal gizarte antolatuko eskuorde eta euskal erakundeetako arduradunekin. Bertan egon ziren, adibidez,   Sindrome de Down Fundazioa eta Caritas, edo FEVAS, Gorabide eta Bizkaiko Gorren Elkartea, eta horiek guztiek aukera izan zuten aditu eskandinaviarren lehen gomendioak ezagutzeko. Bat nator  nire aurreko postari dagokionez “Belokek” egin duen iruzkinarekin, GKE eta irabazteko asmorik gabeko beste antolakuntza batzuetatik boluntario eta profesionalek egiten duten lan aparta eta nekosoarekiko harrotasuna. Guk, aldi berean, horien ardura, beharrizan eta iruzkinak etorkizuneko gure proiektu estrategikoan jasota agertzea  gurako genuke.

Atzo beste urrats bat eman dugu parte hartzea sustatzen duen¨Think Gaur Euskaddi 2020¨ deritzogun etorkizuneko prozesu estrategikoan. Zoritxarrez bilera minutu bateko isilaldiarekin hasi genuen Luis Conderen oroimenez;  berarentzat guztiok, ezin zitekeen beste era batera izan, sentimenduz betetako oroipenak izan genituen.

ETA iragana den bitartean nikKristina L.Sogaard-en hitz batzuk aukeratu nahi nituzke: “Etorkizuna ez da berez datorren zerbait, eraikitzen dugun zerbait baizik”. Proaktibitatetik guk ez dugu etsiko eta Bakean bizi den Euskadi amesten dugu. Aditu eskandinaviarrek, halaber, baieztatu zuten herritarra izateak ez duela esan nahi hartzea bakarrik, trukean zerbait eman behar delako, konpromisoa eduki behar delako, sare globaletan jardungo duten pertsona sortzaileekin, baina tokikoak izateko era berri batetik abiatuta…

Utzidazue orain pasadizo bat kontatzen. Sabino Arana Fundazioarekin lana amaitu ostean Kristina eta Jefreyk Irune Zuluagari esan zioten mesedez “pintxo batzuk jatera” joan nahi zutela. Iñaki Ruiz eta Itziar Mendieta izan ziren anfitrioi lanak egin zituztenak. Bidaia tranbian egin zuten; tartean Deustuko Unibertsitatea, Guggenheim eta Abandoibarra berria goraipatzen zituzten  iruzkinak egin zituzten eta iritsi ziren Arriaga Antzokira. Bertan kasualitatez Kepa Junkera aurkitu eta agurtu zuten; horretaz ari garela, bere azken diskoa goizero ari gara Euskadi Irratia edo Radio Euskadin deskubritzen eta asko gustatzen zait. Handik Plaza Barrira joan ziran.

Urdaiazpikoa, pate eta intxaurdun pintxoak eta ardo ondu gozoa ¨Victor Montes¨ tabernan. Hegaluzea, izokin eta bakailaoa Bizkaiko erara  “Cafe Bilbao¨n. Ematen du Jeff aditu bihurtu dela Alde Zaharreko xarmetan uda aurretik ere aste batzuk egin zituelako Euskadin txostena prestatzen. Kristinak “mesedez” edo “eskerrik asko” adierazten duten kartelek zer esan nahi zuten galdetu zuen eta galdera zuhur baten ostean “Ura mesedez” eskatu zion zerbitzari atseginari. Iñaki eta Itziarrek esan didate gero Sabin Etxean dagoen Aralar Kafetegira etorri zirela eta harrituta ikusi zutela ¨Think Gaur¨ dion pankarta itzela. Jefreyk oraindik ere ia ezpainak miazkatzen jarraitzen zuen eta bere burua eskaini zuen “Euskadiren enbaxadore gastronomikoa izateko  Danimarkan”.

Eta, duda barik, hori bai dela Euskadirengandik eskandinaviarrek zer ikasi asko duten arloetako bat.

Egin duten txostenak argi erakusten digu etorkizunera  iristeko ilusio horrekin oraindik ere gauza asko egin behar ditugula, baina baita harro egon gaitezkeela Euzko Alderdi Jeltzalearen erakunde eta gizarte mailako aitzindaritzaren urte hauetan urratu dugun bidearekin ere.

 

Etiquetas: etorkizuna