Euskeraren Eguna

“Euskaldun jaio nintzan euskaldun hazi
euskera hutsik amak zidan (eustan) irakatsi
euskera maite maite, zabiltz neugaz beti
euskera hil ezkero ez nuke nahi bizi” (bis).

Zenbat aldiz abestuko ote nuen…baita:

“Aitorren hizkuntz(a) zaharra nahi degu zabaldu…”

baita:
“Euskara, euskara, jalgi hadi plazara,…” edota:
“Araban bagare, Gipuzku/o(a)n bagera, Züberun bagire ta Bizkaian bagara
baita ere Lapurdi ta Nafarr(o)an”.
eta…
Zenbat eta zenbat abesti euskera maitatzeko,euskera aldarrikatzeko, euskera goraipatzeko…
bizitza, ohiturak eta nortasuna adierazteko.

Beti gogoan ditudanak gogoan ditudalarik euskeraz bizi egin ahal izateko eman didaten aukeragatik, biharko Euskera-ren Egun(a) honetan baikortasuna adierazi nahi dut.
Bai, badakit eta horretan dihardut euskeraren erabilpena hiztunen artean hori dena erronketariko bat. Baina ekinaren ekinaz lortuko dugula hori ere uste dut.
Nola ez izan behar itxaropenik!

Duela hogeitabost urte nola geunden, nolako bilakaera izan duen arlo guztietan euskerak egunotan gogorarazten digutenez…guzti hori kontutan hartzen baldin badugu, nola ez dugu, ba, itxaropenik izango! Hilzorian egonda eta munduan egotera egin dugu bidea. Horretan ihardun duten guztiei -denei- eskerrik asko eta zorionak!

Joan den astean Kirmen Uribe-rekin solasean berak esaten zuenez ihes egin dezagun “malditismo”-tik euskeran ere. Ez gara txikiak, ezberdinak bai eta munduak askotarikotasuna-aniztasuna behar du. Ez dezagun guretzat baino ez egin, egin dezagun munduarentzat. Bila dezagun euskerarentzako euskeraz hitz-eginaz mundu aurreratuan euskalduntasunaren homologazioa.

Orain arte egindakoak honaino ekarri gaitu. Ondo egindako guztia azpimarratu nahi dut azken hogeitabost urtetan, oker ez banago, ehun eta berrogeita hamar mila euskal hiztun gehiago dagoelako. Badugu oinarria aurrera egin ahal izateko. Ekin diezaiogun euskerari aldarrikatuz, goraipatuz eta maitatuz. Erabil dezagun eta lehen mailan jokatuko dugu. Aurrera!